أكل الجراد في دول الخليج من الممارسات إللي لها أصل في التاريخ.
كثيرمن الناس بيعتبروا المسألة دي مقرفة جداً و دا حقهم لأنها مسألة نسبية. لكن المشكلة أن أغلب الناس دي بتتهم إللي بيعمل كدا أنه متخلف و جاهل و رجعي و طبعاً مقرف و لما نقوللهم أن شعوب دول شرق أسيا بتاكل سحالي و تعابين و جراد و كل أنواع الحشرات و الزواحف يرد يقول طيب ما هما شعوب مقرفة حتى لو كانت دولهم متطورة.
طيب ....
"مخبز فازر - Fazer bakery" هو أول مخبز في فنلندا يبدأ بيع الخبز المصنع من الجراد. آه و الله الجراد.
كل رغيف عيش فيه ٧٠ جرادة مجففة و مطحونة مع دقيق و بعض الحبوب.
في ٢٠١٣، الأمم المتحدة أعلنت أن العالم فيه أكثر من ٢ مليار بني آدم بياكلوا حشرات و أن هناك أكثر من ١٩٠٠ نوع من الحشرات بيتم إستخدامهم في الأكل بشكل أو بآخر.
الأمم المتحدة بدأت في ٢٠١٣ برنامج لتشجيع تربية و أكل الحشرات في العالم من خلال منظمة الأغذية و الزراعة، الفاو، التابعة لها.
النهاردة أوروبا فيها ٥ دول بتسمح بتربية و بيع الحشرات من أجل الإستخدام بغرض صناعة الأغذية و هي هولندا و انجلترا و بلجيكا و النمسا و الدنمارك.
صاحب المخبز الفنلندي بيقول أن النوع دا من الخبز فيه بروتينات أكثر من العيش العادي.
يعني الموضوع طلع كمان له فوائد صحية.
إللي قرفان من الخبر أو شايف أن فيه مبالغة أو أننا مش لازم ناخد كل إللي بنقراه بجدية ممكن يتفرج على "أنجلينا جولي" الممثلة المحبوبة، إللي بتعمل أعمال خير من خلال صفتها كسفيرة بالأمم المتحدة و هي بتحمَّر كام عنكبوت على كام جرادة مع كام عقرب و بتاكلهم هي و أولادها و أصحابها علشان أصلهم بيحبوا الأكل "الصحي".
بالهنا و الشفا .... 
😊
😊
0 التعليقات:
إرسال تعليق