"المفوضية الأوروبية" هي الذراع التنفيذي للإتحاد الأوروبي و المسؤولة عن إقتراح القوانين و التشريعات و تطبيق القرارات و المعاهدات الصادرة عن الإتحاد.
في المفوضية ٢٨ عضو يقوم أحدهم برئاستها و يتم تعيينه من خلال المجلس الأوروبي بموافقة البرلمان الأوروبي بعد إتفاق رؤساء حكومات الدول الأعضاء و دا بيتم قبل النصويت عليه في المجلس الأوروبي.
يعني القرارات اللي بتقرها المفوضية بتكون مُلزمة على دول الإتحاد الأوروبي.
مؤخراً المفوضية قررت القيام بدفع الشركات الأوروبية إللي وضع كوتة للمرأة لعضوية مجالس إدارتها.
حققت المرأة نسبة ٢٩٪ فقط من المشاركة بمجالس إدارة الشركات في انجلترا خلال العام ٢٠١٦ ؟ الرقم دا كان ٣٢,٦٪ في ٢٠١٤. يعني بيقل مش بيزيد.
حتى برغم إرتفاع نسبة مشاركة المرأة في مجالس الإدارة في دول الإتحاد الأوروبي بشكل عام من ١٠٪ في ٢٠٠٥ ل٢٢٪ في ٢٠١٥، إلا أن نسبة وصولهم لكرسي رئاسة المجالس أو رئاسة الشركات مش أكثر من ٦٪.
دا في أوروبا ... عنصريين أوي الناس الفشلة دي يا أخي !!
على فكرة، النساء نسبتهم كخريجي جامعات في أوروبا هي ٦٥٪ من العدد الكلي.
فكرة الكوتة إللي بتلزمها المفوضية الأوروبية هي أن الشركات إللي نسبة الذكور في مجالس إدارتها تزيد عن ٦٠٪ هاتكون مُطالبة بوضع أولوية للنساء المتقدمات للوظائف عن الذكور في محاولة لتنفيذ توصيات الأمم المتحدة لتحقيق إحدى أهدافها بخطتها المُسماة ب"أهداف التنمية المستدامة للعام ٢٠٣٠".
و هنا يحضرني أكثر من تساؤل :
فين المساواة إللي العالم الغربي بيحتفي بيها و هارينا كلام عنها و إللي أبناء الشعوب المتخلفة بتطالب بيها في دولهم كأنها طوق النجاة للخروج من مستنقع التخلف و الرجعية ؟
فين المساواة إللي أوروبا بتعاني منها، طبقاً لكلامهم و خططهم، و إللي دول تانية زي اليابان، إللي بنطلق عليها "كوكب اليابان"، بتحتل مراكز متأخرة جداً في قياسه العالمي ؟
و طالما أن "المساواة" غير متحققة بالفعل زي ما بيقولوا، إذاً مش نقدر نقول يرضة أنهم وصلوا لقمة التقدم التقدم و التحضر إللي بنحلف بيه النهاردة من غيره ؟ يعني التساؤل عن مدى تأثير المساواة بين الجنسين في بقاء الدول دي على قمة تقدمها و تحضرها مش سؤال مشروع برضة ؟ و التشكيك في كون أن المساواة دي ممكن آثارها تؤدي بيها إلي نتيجة كارثية مش إحتمال قائم و ممكن الحدوث ؟ يعني الأطروحة القائلة بأن الخلل في منظومة سوق العمل بتساوي الجنسين ممكن تؤدي إلى خلل في المنظومة الإجتماعية دي مش أطروحة معتبرة و ممكنة الحدوث ؟ الإفتراض دا مش برضة جائز و محتما بكونهم بالفعل متقدمين بدون تحقيق قيمة "المساواة" ؟
لكن التساؤل الأكثر أهمية بالنسبالي هو : إية هي القيم الثابتة عند الحضارة الغربية ؟
هل الأسلوب الوحيد لتحقيق قيمة "المساواة" هو من خلال محاصرة و تقييد قيمة "حرية الرأي" و "حرية الإختيار" من خلال وضع لوائح و قوانين و موانع تمنع الأغلبية من إختيار ما يرغبون فيه لأي سبب فقط كان ؟ و هل المبدأ الأساسي إللي بنى عليه المجتمع الغربي حضارته، و هو مبدأ "الديمقراطية"، أصبح كتمثال العجوة كل ما يجوع صاحبه ياكل منه ؟ فين الديمقراطية طالما أنك بتلزم طرف ما بإختيار فئة ما دون غيرها ؟ هل حل فشل المجتمع الغربي "المتحضر" في تنفيذ قيمة "المساواة" من خلال تغيير أفكار المجتمع هو أنهم يطبقوه "عنوةً" ؟ يطبقوه بالعافية ؟ أمال فين الحريات ؟
أفهم من كدا أن القيم محتاجة قوانين ؟ يعني القيم محتاجة لوائح ؟ يعني القيم محتاجة حواجز لمنع ما يمنع تنفيذها ؟
يعني القيم محتاجة حصار قيم أخرى لأن في حاجة إسمها أولويات حتى في القيم ذاتها ؟
خلاص .... أنتوا زعلانين مننا لية ؟
لية زعلانين لما بنطالب بوضع رقابة على سلوكيات بعض أصحاب المهن الفنية و الفكرية لأن أعمالهم لها تأثير سيء على المجتمع ؟
لية بتزعلوا لما بنطالب بمحاكمة و محاسبة كل شخص بيتجرأ على قيمنا العليا و بتطالبوا بحرية الرأي و التعبير إللي هي قيم الحضارة الغربية ؟ الحضارة الغربية إللي بنفسها بحاصر بعض القيم من أجل إعلاء قيم غيرها مكانها !!
الحضارة الغربية المُمثلة في أوروبا و أمريكا إللي بتضرب بجميع قيمها عرض الحائط لما بتتزنق.
الحضارة الغربية إللي بتهدم أفكارها و تستبدل المفاهيم و المصطلحات و بتغيرها تماماً و بتستبدلها علشان تحل مشاكلها.
حرية المرأة مثلاً قيمة عند الغرب. لكن لما يكون خروج المرأة للعمل بيشغلها عن تكوين أسرة و عزوف الشباب عن الزواج بيزيد و الممارسة الجنسية الأصل فيها خارج منظومة الزواج و يكون المجتمع مهدد بالإنقراض مع الوقت، إذاً لا بديل أمام الحضارة الغربية للحفاظ على كيانها الأساسي و هو الشعب و المجتمع إلا بإستبدال المفاهيم و الأفكار.
وقتها يصبح من يستطيع الإنجاب و ليس لديه أطفال .... عقيم.
وقتها فقط تغيِّر منظمة الصحة العالمية توصيف "عقيم" ليشمل الشخص القادر على الإنجاب و ليس لديه شريك لإنتاج أطفال. حتى إن كان هذا الشخص شاذ جنسياً. https://www.facebook.com/engwaelmans/posts/10155604112515659
المهم يجيبوا أطفال. المهم يحافظوا على العدد. المهم المجتمع ينتج أفراد تانيين. مش مهم إزاي. حتى لو آلياً و حتى لو من خلال مزارع إنتاجية ..... مش مهم إزاي.
مش مهم الأفكار تكون راكزة. مش مهم القيم تكون راسخة. مش مهم يكون في أي ثوابت. المهم تفضل العجلة بتلف. حتى لو كانت بتلف نحو الهاوية ..... الهاوية إللي جميع الحضارات السابقة سقطت فيها.
و مش مهم إننا إحنا كمان نمشي وراهم حتى في أفكارهم و في فلسفتهم و في منهجهم.
فقط لأنهم ........ متحضرين.
0 التعليقات:
إرسال تعليق